Hozirgi globallashuv sharoitida har qanday milliy iqtisodiyotning raqobatbardoshligi tobora koʻproq innovatsiyalar – yangi bilim, texnologiya va boshqaruv yechimlarini yaratish hamda ularni amaliyotga tatbiq etish qobiliyati bilan belgilanmoqda. XXI asr iqtisodiyotida asosiy yetakchi kuch kapital yoki tabiiy resurslar emas, balki intellektual salohiyat va innovatsion faollikdir. Mana shu sharoitda korxonalar va davlatlarning bozordagi muvaffaqiyati koʻp jihatdan innovatsion marketingning toʻgʻri shakllantirilishiga bogʻliq boʻlib qoladi. Innovatsion marketing yangi mahsulot va xizmatlarni nafaqat yaratish, balki ularni isteʼmolchiga yetkazish, talab shakllantirish va bozorda mustahkamlanish jarayonlarini birlashtiradi.